امریکا قوشمه ایالتلری افغانستانده هوا عملیاتی اویوشتیردی

امریکا قوشمه ایالتلری, 26- آگست کونی کابل هوا قونلغه سی یقینیده اویوشتیریلگن ترورچیلیک هجومی نینگ مسئولیتی نی اوز بوینی گه آلگن داعش- خراسان نینگ باشقروچیسی گه قرشی افغانستانده هوا عملیاتی اویوشتیریلگن لیگی نی بیلدیردی. 

امریکا قوشمه ایالت لری مرکز کوچ لری (CENTCOM) سوزچیسی بیل اوربان اوشبو توغریده یازمه بیانات بیردی. 

اوربان, "امریکا قوشمه ایالتلری حربی کوچ لری, بیر داعش- خراسان باشقروچیسی گه قرشی عملیات اویوشتیردی" دییه قید ایتدی. 

سوزچی, اوشبو عملیات نینگ افغانستان نینگ ننگرهار ولایتیده, پیلوتسیز اوچاق دن فایده له نیب اویوشتیریلگن لیگی نی بیلدیردی. 

اوربان, "دسلبکی معلومات لر گه کوره هدف نی اولدیردیک.  بو عادی اهالی نینگ جان بیریشی گه سبب بولمه گن" دییه قید ایتدی. 

پنجشنبه کونی کابل هوا قونلغه سی یقینیده انتحاری هجوم اویوشتیریلگن ایدی. 

اوشبو حادثه عاقبتیده 13 نفر امریکا لیک حربی بیلن 170 نفر افغانستان لیک عادی اهالی جان بیرگن ایدی. 

هجوم نینگ مسئولیتی نی داعش- خراسان اوز ذمه سیگه آلرایکن, امریکا قوشمه ایالتلری دولت رهبری جو بایدن ایسه اوشبو هجوم گه قرشی جواب قیتریله دیگن لیگی نی معلوم قیلگن ایدی.